اشتراک سرپرست وزارت مخابرات امارت اسلامی در نشست سه‌جانبه تاشکند
نجیب‌الله حیات حقانی، سرپرست وزارت مخابرات و تکنالوژی معلوماتی امارت اسلامی افغانستان، در یک نشست سه‌جانبه با همتایان خود از اوزبیکستان و تاجیکستان در شهر تاشکند، پایتخت اوزبیکستان، شرکت کرد. این نشست با محور همکاری‌های منطقه‌ای در حوزه فناوری و خدمات دیجیتال برگزار شد.
براساس اعلام وزارت مخابرات و تکنالوژی معلوماتی، این دیدار با حضور وزیر فناوری‌های دیجیتال جمهوری اوزبیکستان و وزیر صنعت و فناوری جمهوری تاجیکستان انجام شد و موضوعات کلیدی چون گسترش همکاری‌های منطقه‌ای در زمینه فناوری معلوماتی، مخابرات، توسعه خدمات پستی و انتقال تجارب فنی مورد بحث و بررسی قرار گرفت.
به گفته منابع رسمی، سه کشور در این نشست به توافق‌هایی اولیه در زمینه همکاری‌های مشترک در عرصه تکنالوژی معلوماتی و دیجیتال‌سازی خدمات دست یافتند.
نشست تاشکند به ابتکار و دعوت وزیر صنعت و فناوری جمهوری تاجیکستان برگزار شده و هدف آن تسریع روند همگرایی دیجیتال میان کشورهای منطقه و تقویت زیربناهای تکنالوژیکی عنوان شده است.
مقامات وزارت مخابرات امارت اسلامی افغانستان حضور در این نشست را گامی مؤثر در جهت توسعه روابط فناوری و بهره‌گیری از تجارب موفق کشورهای همسایه ارزیابی کرده‌اند.
