د آمريکا د ملي امنیت سلاکار جک سليوان وايي، ولسمشر جوبایډن به ترکیې ته د ایف شپاړس جنګي جېټ الوتکو د استولو پلان له کانګرس سره سلامشورو ته دوام ورکړي.
توانا خبري اژانس د چنګاښ 21، ښاغلي سولیوان د ناټو د سرمشریزې په غونډه کې وویل، بایډن ډاډ ورکړی چې د الوتکو د سپارلو په برخه کې ليوال دی، خو په دې اړه يې نور څه ونه ويل.
د ترکیې ولسمشر رجب طیب اردوغان تېره شپه هوکړه وکړه چې په ناټو کې د سویډن د غړیتوب پلان به پارلمان ته راجع کړي.
پر اوکراین د روسیې تر یرغل وروسته سویډن په ناټو کې د غړیتوب غوښتنه کړې، خو ترکیې یې مخالفت کړی.
انقره له میاشتو راهیسې د امریکا او نورو متحدانو تر فشار لاندې وه چې په ټلواله کې د سویډن غړیتوب ومني.
سهراب خان دولت زى
توانا خبري اژانس
