په افغانستان کې د اقلیمي بدلونونو د اغېزو زیاتېدو له کبله، دغه هېواد د پرله پسې دریم کال لپاره له وچ اوبۍ سره مخ دی، چې له کبله یې په یو شمېر ولایتونو کې کرنیز محصولات اغېزمن کړي دي.
توانا خبري اژانس د جوزا 23، کندهار، چې څه باندې ۲۰ زره هکټاره ځمکه یې د انګورو باغونو پوښلې، یو له هغه ولایتونو نه دی، چې اقليمي بدلون په کې خپلې اغېزې پرېښې دي.
دغه ولایت د ژېړۍ ولسوالۍ اوسيدونکي وايي چې، تېر کال د اوبو لږوالي او تر هغه را وروسته د فصل ټولولو پر وخت بې وخته ورښتونو یې ددوي پیداوار اغېزمن کړل.
د افغانستان په نژدې ټولو ولایتونو کې بڼوالي په عنعنوي یا دودیز بڼه کېږي.
خو په کندهار کې د (Roots of Peace) یا د سولې بنسټ استازی فیض الرحمن ابراهیمي وایي تېر یو کال کې یې په کندهار، هلمند، کندوز او بلخ کې په نمونوي توګه ۱۰۰۰ جریبه د انګورو باغونه چیله عصري سیسټم ته اړولي دي.
دى وايي چې د موسوم بدلونونه، وچکالي او بي وخته بارانونه ددې لامل ګرځيدلي چې بزګران خپل پيداوار له لاسه ورکړي
نوموړی وایي په عصري بڼوالۍ کي انګور د ځمکې له سطحې لوړ او د باران له ورېدو وروسته د باد په مرسته وچېږي او په دې سیسټم کې له ۲۰ تر ۳۰ سلنه پورې په پیداوار کې زیاتوالی راځي.
د يادونې وړ ده چې، انګور د افغانستان د کرنیزو تولیداتو تر ټولو لویه برخه جوړوي او د کرنې وزارت د مالوماتو له مخې هر کال نژدې ۹۰۰ زره ټنه انګور په دغه هېواد کې تولیدېږي.
سهراب خان دولت زى
توانا خبري اژانس
