د اسلامي امارت لوړو زده کړو چارواکي وايي چې، د پوهنتونونو استادانو تحصيلي رتبو ته په کتو سره، د دوي تنخاوې به له 36 نه 54 سلنه پورې زياتې کړي
توانا خبري اژانس وري 22، استادان وايي له هغه راهیسې چې د دوی تنخواګانې او امتیازات تر ۴۰ سلنې پورې کم شوي وو، دوي له ګڼو ستونزو سره مخامخ وو، خو اوس هیله من دي چې د تنخواګانو له لوړیدو سره به یې اقتصادي ستونزې هوارې شي او نور استادان به د اقتصادي ستونزو له امله هېواد نه پرېږدي.
د چارواکو په وینا، تنخواګانې له ۳۶ نه تر ۵۴ سلنې پورې لوړې شوې دي. دا چې کوم علمي رتبې ته به څومره تنخوا یا معاش ورکول کېږي په اړه یې د ياد لوړو زده کړو وزارت ویاند حافظ ضیاء هاشمي ته وویل چې، د پوهنتونونو د استادانو دا تنخواګانې به له حمل (وري) میاشتې راهیسې اجرا کېږي او په وینا یې د پوهنتونونو د نورو بستونو پر تنخوګانو هم کار روان دی.
دا په داسې حال کې ده چې، د پوهنتونونو استادانو شکایت کاوه چې تنخواګانې او امتیازونه یې نژدې ۴۰ سلنه کم شوي او غوښتنه یې کوله چې د توکیو بیو لوړوالي او د دوی کاري مکلفیتونو ته په پام سره باید بېرته لوړ شي.
سهراب خان دولت زى
توانا خبري اژانس
